Pamali.
Palui taumpat himung jua wayah bubuhan pegawai babagi gajih ka-13.Walaupun inya tu cuma patugas kabarsihan marangkap susuruhan dikator pambakal,tapi inya kana bagian jua dapat gajih ka-13 itu.
"Kalu kalat liur ada haja tatambahannya Bus ai, yaitu gula batu ," ujar Tulamak manggawil Garbus mamadahakan Palui nang hanyar bulik matan kalurahan.
"Gula batu kada manganyangi Mak ai, tapi kalu parut lapar wan kadada kawan nang mambawai ka warung maka tapaksa galurukan parut maarit lapar."ujar Garbus manyirit Palui.
"Nah, pas banar Palui datang, mancari hundayang tadapat suluh. Sudah babagi kalu? Ayu Lui kita ka warung acil,parutku sudah hibak wan angin." ujar Tulamak.
"Kita urang tuha ini nyaman-nyaman makan, padaha dahulu wayah lagi kakanakan banyak banar pantangannya." ujar Palui
"Pantangan napa Lui?" ujar Garbus kada paham.
"Wayah kakanakan itu bila makan , banyak banar pamalinya. Kada bulih makan badahulu pada urang tuha makanya harus babudi.Karna babudi maka nang dimakan sisa-sisanya haja. BIla diurang aruh kada bulih makan iwak hati wan bila makan iwak kambing kada bulih mamakan utaknya. BIla wayah bulikan saruan kada bulib mambarakat.Bila parsadian kada cukup maka kakanakan kabagian nasi kawak wan kuah-kuahnya haja."ujar Palui.
"Sawatlah ikam mangalami Mak." ujar Garbus.
"Karna banyaknya pamali dan kada bulih itulah maka wayah lagi halus awakku kurus karing Bus ai." sahut Tulamak.
"Wayah lagi halus itu siTualamak kurus karing kada marga kada banyakpamali wan kada bulih it Bus ai, tapi karna parutnya dasar cacingan." ujar Palui mahuhulut Tulamak.
"Kalu kaiti baiknya jangan ditiru gasan kakanakan wayah ini." ujar Garbus
"Saran ikam it banyak haja BUs ai, tapi harus diingat bahwa urang tuha kita bahari itu ada maksudnya.Satiap nang pamali ada maknanya.Cuntuhnya kida kada bulih mahiris kuku malam hari dipadahakan bisa tasayat urag halus, padahal maknanya supaya jangan luka karna hari kadap.Wayah sanja jangan duduk di muhara lawang maknanya manggangu turun naik wayah magrib." ujar Palui.
"Kalu kakanakan kada bulih mamakan hati atawa utak kambing tadi napa maknanya Lui?" ujar Tulamak.
"Kukira maknanya supaya nang nyaman - nayaman itu gasan urang tuha haha." sahut Palui.
"Hahaha....hahahahahaha....kalu kaya itu kita cagar makan nyaman iwak hati hayam diwarung acil Isul dibayariakan Palui." ujar Tualamak mangalakak tatawa.
"Kita ini tamasuk kakanakan bahari jadi iwaknya sapat kring haja." ujar Palui kada hakun kalah.
Panyakit Dalam.
Bakakajutan si Palui mandatangi Garbus karumahnya. Gancang banar inya manggandah lawang rumah si Garbus.
"Assalamuaikum BUs, uiii...Garbus aku handak minta tulung ." ujar Palui kuciak-kuciak matan diluar.
"Alikumsalam,minata tulung napa Lui? Duitku kada baisian jadi aku kada kawa mainjami duit." ujar Garbus wayah mambukai lawang.
"Aku kada handak mainjami duit, tapi kada minta tulung tanaga ikam."ujar Palui.
"Napa kaitannya antara tanagaku wan muha ikam nang pina maram itu?"ujar Garbus.
"Tulung gani'i aku ka rumah sakit."ujar Palui
"Siapa nang garing bangat Lui, pina bagagasakan mambawai aku handak ka rumah sakit ."ujar Palui.
"Aku kada tahan lagi maarit, lakasi kiyauakan bica."ujar Palui manyuruh.
Garbus tapaksa mangiyau bica.Imbah manawar lalu badadua langsung babuat manuju rumah sakit.Imbah sampai ka rumah sakit Palui maminta tulung Garbus mandaftarakan inya ka bagian panyakit dalam.
"Ooooooo...ikamkah nang garing Lui?Mustinya gasan bapariksa kada usah ka bagian panyakit dalam tapi ka dukter umum haja lalu kaina hanyar di konsultasiakannya kadukter spesialis."ujar Garbus.
"Aku kada tahan lagi."ujar Palui pina basilah sambil tangannya garisik garisik bagaru.
Imbah lawas mahadang,akhirnya kana giliran Palui pulang nang dikiyau ulih parawat.Palui tahiring hiring bajalan, sambil dituntun ulih Garbus inya masuk ka ruang dukter.
"Ikam garing napa Lui? Napa nang diarit, batukankah,sakit parutkah,jantungkah,ginjalkah?''ujar dukter batakun."Ayu lakasi buka baju lalu barabah, kupariksa,"ujar dukter.
"Sakit banar dok ai, aku kada tahan lagi ma arit."ujar Palui takuringis.
Lalu ai dukter mulai mamariksa Palui.Palui disuruh barabah lalu dipariksa jantungnya,paru-paru,parut,muntung,mata lalu dukter baucap.
"Sabujurnya napa nang ikam arit Lui? Samunyaan baik haja."ujar dukter.
"Padih banar,padiiihhhh....ulun sabujurnya mandarita panyakit dalam dukter ai." ujar Palui sambil bagaru..
"Samunyaan nurmal haja"ujar dukter
"Ini nah panyakit dalam ku.....panyakit dalam salawar."ujar Palui sambill mambuka kima salawarnya.
"Ooooooo...panyakit itu cukup babahaya Lui ai, itu panyakit urang bedosa nang katuju jajan diluaran.Untung ikam lakas baubat.Ayu lakasi mandaftar ka subalah ka dukter spesialis panyakit kalamin biar ikam disuntik wan panisilin.."ujar dukter manasihati Palui.
Sumber: Banjarmasin Post
Sumber: Banjarmasin Post
0 Response to "Kumpulan Cerita Si Palui"
Posting Komentar